AI Index Report 2024

ສະຫລຸບສ່ວນສຳຄັນຈາກລາຍງານ AI Index Report 2024 ຈາກ Stanford University Human-Centered Artificial Intelligence

ກ່ຽວກັບງານວິໄຈ ແລະ ການພັດທະນາ

ປີ 2023 ຂະແໜງອຸດສະຫະກຳ ສາມາດສ້າງ 51 notable AI models ອອກມາໄດ້ ໃນຂະນະທີ່ຂະແໜງການສຶກສາມີພຽງ 15 models ສາເຫດແມ່ນມາຈາກເງິນທຶນທີ່ໃຊ້ສ້າງໂມເດວມີຄ່ອນຂ້າງສູງ ເຮັດໃຫ້ຂະແໜງອຸດສະຫະກຳມີຄວາມຄືບໜ້າໄດ້ໄວກ່ອນ. ໂມເດວສ່ວນໃຫຍ່ແມ່ນມາຈາກ ສະຫາລັດອາເມລິກາ, ຈີນ ແລະ ສະຫາລາຊະອານາຈັກ.
ງົບປະມານໃນການສ້າງໂມເດວເອໄອແມ່ນມະຫາສານຫລາຍ ຕົວຢ່າງ OpenAI’s GPT-4 ໃຊ້ງົບປະມານ ສະເລ່ຍຢູ່ທີ່ $78 ລ້ານ ໃນການ train ໂມເດວ ແລະ ໂມເດວຂອງ Goolge’s Gemini Ultra ໃຊ້ປະມານ $191 ລ້ານ. (ຄວາມເຫັນສ່ວນໂຕຄິດວ່າ ບໍລິສັດໃຫຍ່ໆໄດ້ປຽບທັງເລື່ອງຂໍ້ມູນ ແລະ ງົບປະມານໃນການສ້າງ ເຮັດໃຫ້ມີ gap ຂອງການພັດທະນາໃນແຕ່ລະພາກສ່ວນຫຼາຍຂຶ້ນໆ)
ຈຳນວນງານວິໄຈເພີ່ມຂຶ້ນ 3 ເທົ່າໂຕ ໃນໄລຍະ 10 ປີຜ່ານມາ.
ຈຳນວນການຈົດສິດທິບັດກໍ່ເພີ່ມຂຶ້ນເຊັ່ນກັນ ສູງສຸດແມ່ນ ຈີນ ຮອງລົງມາແມ່ນ ສະຫາລັດອາເມລິກາ ແລະ ສະຫາລາຊະອານາຈັກ.

ກ່ຽວກັບປະສິດທິພາບ

ເອໄອ ເຮັດວຽກໄດ້ດີກວ່າມະນຸດໃນບາງໜ້າວຽກ ແຕ່ຍັງບໍ່ແມ່ນທັງໝົດ
ເອໄອສ່ວນຫລາຍຍັງເຮັດວຽກໄດ້ສະເພາະດ້ານ ເຊັ່ນ: ຮູບພາບ, ຂໍ້ຄວາມ, … ແຕ່ກໍ່ມີບາງໂມເດວເອໄອທີ່ສາມາດເຮັດວຽກໄດ້ດີໃນຫລາຍໆດ້ານເຊັ່ນ GPT-4 ແລະ Gemini ທີ່ສາມາດປະມວນຜົນໄດ້ທັງຮູບພາບ ແລະ ຂໍ້ຄວາມ ແລະ ອາດຈະມີສຽງພ້ອມ
ເອໄອຖືກນຳໃຊ້ເຂົ້າໃນໂລບ໋ອດຫລາຍຂຶ້ນ ເພື່ອເພີ່ມປະສິດທິພາບການໃຊ້ງານ ແລະ ເຮັດໃຫ້ໂລບ໋ອດປັດຈຸບັນສາມາດໂຕ້ຕອບກັບມະນຸດໄດ້
Closed models (ໂມເດວທີ່ບໍ່ໄດ້ເປີດໃຫ້ໃຊ້ງານທົ່ວໄປ) ເຮັດວຽກໄດ້ດີກ່ອນແບບ Open model. ຄວາມແຕກຕ່າງນີ້ຍັງຕ້ອງເປັນສ່ວນສຳຄັນໃນການເອົາໄປໂຕ້ວາທີຂອງການສ້າງນິຕິກຳ ແລະ ກົດລະບຽບການໃຊ້ງານເອໄອໃນອະນາຄົດ.

ກ່ຽບກັບຄວາມຮັບຜິດຊອບຂອງການນຳໃຊ້ AI

ມາດຕະຖານໃນການວັດຜົນຂອງໂມເດວເອໄອສຳລັບຄວາມຮັບຜິດຊອບຂອງຜົນທີ່ຈະເກີດຂຶ້ນ ຍັງມີໜ້ອຍ ແລະ ຕ້ອງການການປັບປຸງໃຫ້ດີຂຶ້ນຕື່ມ
deepfake ຍັງຖືກນຳໃຊ້ຫລາຍໃນການເມືອງ ເຊິ່ງຍັງຍາກທີ່ຈະກວດສອບວ່າອັນໃດແທ້ອັນໃດປອມ ເຮັດໃຫ້ມີຄວາມສ່ຽງກ່ຽວກັບດ້ານການເມືອງ
ຫຼາຍໆທຸລະກິດມີຄວາມກັງວົນໃນການນຳໃຊ້ AI ເປັນຕົ້ນແມ່ນຄວາມເປັນສ່ວນໂຕ, ຄວາມປອດໄພຂອງຂໍ້ມູນ ແລະ ຄວາມໜ້າເຊື່ອຖື.
ນັກວິໄຈຫຼາຍຄົນຄົ້ນພົບວ່າ ຜົນໄດ້ຮັບຂອງເອໄອຍັງມີບາງສ່ວນທີ່ຖືກສ້າງຈາກຂໍ້ມູນທີ່ມີລິຂະສິດ ເຊັ່ນ ຂໍ້ຄວາມທີ່ມາຈາກຂ່າວ ຮູບທີ່ມາຈາກໃນໜັງ ແລະ ອື່ນໆອີກ, ເຊິ່ງຍັງເປັນຄຳຖາມໃຫ້ຖົກຖຽງກັນຢູ່
ນັກພັດທະນາເອໄອຍັງຂາດຄວາມໂປ່ງໃສ ເຊັ່ນການເປີດເຜີຍຂໍ້ມູນທີ່ໃຊ້ສ້າງເອໄອໂມເດວ ແລະ ວິທີການໃນການສ້າງ.
ChatGPT ມີຄວາມລຳອຽງທາງດ້ານການເມືອງ. ນັກວິໄຈຄົ້ນພົບວ່າ Chatgpt ມີຄວາມລຳອຽງແບບພົ້ນເດັ່ນໃນການເລືອກພັກການເມືອງໃນ US. ເຮັດໃຫ້ມີຄວາມສ່ຽງ ແລະຜົນຕໍ່ການເລືອກຕັ້ງໃນຕໍ່ໜ້າ

ກ່ຽວກັບເສດຖະກິດ

ງົບປະມານທີ່ລົງທຶນໃນ Generative AI ໃນປີທີ່ຜ່ານມາແມ່ນເພີ່ມຂຶ້ນສູງແບບກ້າວກະໂດດ. ສະຫາລັດອາເມລິການລົງທຶນໃນ AI ຫຼາຍກວ່າ $67.2 ພັນລ້ານ.
ເອໄອຊ່ອຍຫຼຸດຕົ້ນທຶນ ແລະ ເພີ່ມຍອດຂອງທຸລະກິດ, ເຊິ່ງສະແດງໃຫ້ເຫັນເຖິງບົດບາດອັນສຳຄັນຂອງການນຳໃຊ້ເອໄອໃນພາກທຸລະກິດໃນປັດຈຸບັນ
ຈາກລາຍງານຂອງ McKinsey ປີ 2023 ເປີດເຜີຍວ່າ 55% ຂອງອົງກອນໃນປັດຈຸບັນນຳໃຊ້ເອໄອເຂົ້າໃນທຸລະກິດ ຫຼື ບາງໜ້າວຽກ
ເອໄອເຮັດໃຫ້ຄົນເຮັດວຽກແລ້ວໄວຂຶ້ນ ແລະ ສາມາດເຮັດຜົນງານອອກມາໄດ້ຫລາຍກວ່າເກົ່າ
ບໍລິສັດໃນ Fortune 500 ເວົ້າເຖິງເອໄອຫລາຍຂຶ້ນ ໂດຍສະເພາະແມ່ນ Generative AI

ກ່ຽວກັບວິທະຍາສາດ ແລະ ການຢາ

ເອໄອເປັນໂຕເລັ່ງທີ່ດີໃນການຄົ້ນພົບທາງວິທະຍາສາດ
ເອໄອຖືກນຳມາໃຊ້ໃນຂະແໜງການການຢາຫຼາຍຂຶ້ນ
ອຸປະກອນການແພດທີ່ນຳໃຊ້ເອໄອຖືກອະນຸມັດໃຫ້ໃຊ້ງານ ແລະ ຈຳໜ່າຍຫລາຍແລ້ວໃນປັດຈຸບັນ.

ກ່ຽວກັບການສຶກສາ

ນັກສຶກສາສາຍວິທະຍາສາດຄອມພິວເຕີ, ວິສະວະກຳຄອມພິວເຕີ ແລະ ໄອທີ ເພີ່ມຂຶ້ນສູງໃນໄລຍະຜ່ານມາ
ນັກສຶກສາປະລິນຍາເອກໃນພາກອຸດສະຫະກຳມີສູງຂຶ້ນ ແລະ ເຂົາເຈົ້າຕ້ອງການທີ່ຈະຢູ່ໃນຂະແໜງອຸດສະຫະກຳຫຼາຍກວ່າການເຂົ້າຢູ່ໃນສາຍການສຶກສາ ຫຼື ມະຫາໄລ
ຈຳນວນຄົນທີ່ຍ້າຍຈາກພາກເອກະຊົນ ຫຼື ພາກອຸດສະຫະກຳ ມາມະຫາໄລມີໜ້ອຍລົງ
ມະຫາໄລຫຼາຍແຫ່ງສ້າງຄອສການຮຽນທີ່ເນັ້ນໃສ່ AI ຫຼາຍຂຶ້ນ

ກ່ຽວກັບນະໂຍບາຍ ແລະ ການປົກຄອງ

ນະໂຍບາຍການຄຸ້ມຄອງກ່ຽວກັບເອໄອໃນສະຫາລັດອາເມລິການແມ່ນສູງຂຶ້ນຫລາຍ ເຊິ່ງໃນຫລາຍໆປະເທດກໍ່ກຳລັງກະກຽມເພື່ອອອກນະໂຍບາຍເປັນຂອງຕົນເອງ ເພື່ອໃຫ້ໝັ້ນໃຈວ່າການນຳໃຊ້ເອໄອພາຍໃນປະເທດ ມີຄວາມສອດຄ່ອງ, ປອດໄພ, ຖືກຕ້ອງ ແລະ ບໍ່ສົ່ງຜົນຮ້າຍຕໍ່ປະຊາຊົນ ແລະ ປະເທດ (ຂ້າພະເຈົ້າກໍ່ເປັນໜຶ່ງໃນຄະນະຕົວແທນຈາກລາວ ຂອງພາກເອກະຊົນ ເພື່ອເຂົ້າຮ່ວມງານ AI Connect Program II, ໃນການອອກນະໂຍບາຍ ແລະ ການປົກຄອງກ່ຽງກັບເອໄອໃນ ສປປ ລາວ, ລໍຖ້າຕິດຕາມຕື່ມ)

ກ່ຽວກັບຄວາມເຫັນຂອງສາທາລະນະ

ຄົນສ່ວນຫຼາຍຄິດວ່າເອໄອຈະມາມີຜົນຕໍ່ການໃຊ້ຊີວິດຂອງເຂົາເຈົ້າໃນອີກຫ້າຫາສິບປີ ຄິດເປັນ 66%. ເຊິ່ງກໍ່ມີ 52% ຄິດກັງວົນໃນການນຳໃຊ້ເອໄອໃນຜະລິດຕະພັນ ແລະ ບໍລິການຂອງເຂົາເຈົ້າ.
ຈາກລາຍງານຂອງ University of Toronto ລາຍງານວ່າ 63% ຂອງຜູ້ເຂົ້າຮ່ວມຕອບອບບສອບຖາມບອກວ່າເຂົາເຈົ້າຮູ້ຈັກ ChatGPT

Reference: https://hai.stanford.edu/research/ai-index-report