AI ແລະ ວຽກເຮັດງານທໍາ

ປັນຍາປະດິດ (AI) ກໍາລັງສ້າງຜົນກະທົບຢ່າງຫຼວງຫຼາຍຕໍ່ຕະຫຼາດແຮງງານ, ໂດຍສ້າງທັງໂອກາດ ແລະ ຄວາມທ້າທາຍ. ໃນຂະນະທີ່ AI ສາມາດເພີ່ມປະສິດທິພາບ ແລະ ຜະລິດຕະພາບ (Productivity), ມັນກໍ່ຍັງມີທ່າແຮງທີ່ຈະທົດແທນວຽກບາງປະເພດ, ສ້າງຄວາມກັງວົນກ່ຽວກັບການຫວ່າງງານ ແລະ ການປ່ຽນແປງທີ່ຮຸນແຮງຂອງເສດຖະກິດ.

ວຽກເຮັດງານທໍາຫຼາຍປະເພດທີ່ປະກອບດ້ວຍໜ້າວຽກຊ້ໍາໆ ຫຼື ເປັນແບບແຜນຊັດເຈນ ແມ່ນມີແນວໂນ້ມທີ່ຈະຖືກ AI ມາເຮັດໃຫ້ອັດຕະໂນມັດ. ປະກອບມີ ວຽກບັນຊີພື້ນຖານ, ວຽກການປະກອບຊິ້ນສ່ວນ, ການບໍລິການລູກຄ້າ. ໂດຍສະເພາະ ພາກສ່ວນການຜະລິດ, ຂົນສົ່ງ ແລະ ການຂາຍມີແນວໂນ້ມທີ່ຈະໄດ້ຮັບຜົນກະທົບຫຼາຍທີ່ສຸດຈາກການນໍາໃຊ້ຫຸ່ນຍົນອັດສະລິຍະ.

ຢ່າງໃດກໍ່ຕາມຄວນເບິ່ງວ່າ AI ຍັງສ້າງວຽກເຮັດງານທໍາໃໝ່ຈໍານວນໜຶ່ງນໍາ. ຄວາມຕ້ອງການນັກວິທະຍາສາດຂໍ້ມູນ, ວິສະວະກອນ AI, ນັກພັດທະນາຊອບແວ ແລະ ຜູ້ຊ່ຽວຊານດ້ານຈັນຍາບັນກ່ຽວກັບ AI ຄາດວ່າຈະເພີ່ມຂຶ້ນຕາມການນໍາໃຊ້ເຕັກໂນໂລຊີ AI ຢ່າງແຜ່ຫຼາຍ. ນອກນັ້ນ AI ຍັງເປີດໂອກາດໃຫ້ແກ່ອາຊີບໃໝ່ໆທີ່ຕ້ອງການຄວາມຮູ້ ແລະ ທັກສະສະເພາະດ້ານຂອງມະນຸດ ເຊັ່ນ ວິສະວະກອນຝຶກອົບຮົມ AI, ນັກການສື່ສານດ້ານ AI ແລະ ຜູ້ປະສານງານ AI ກັບມະນຸດ.

ທັດສະນະຂອງຂ້າພະເຈົ້າແມ່ນເຮົາຕ້ອງມີຄສາມລະມັດລະວັງ ແລະ ຮອບຄອບຕໍ່ການນໍາໃຊ້ AI ໃນບ່ອນເຮັດວຽກ ສະຖານສຶກສາ ແລະ ໃນອຸດສະຫະກຳຕ່າງໆ. ເຖິງວ່າການປັບປຸງປະສິດທິພາບ ແລະ ການເຕີບໂຕທາງເສດຖະກິດຈະສໍາຄັນ, ພວກເຮົາກໍ່ຕ້ອງຮັບປະກັນວ່າຜົນປະໂຫຍດຖືກກະຈາຍໄປຢ່າງເທົ່າທຽມກັນ ແລະ ຮັບປະກັນວ່າຜູ້ອອກແຮງງານໄດ້ຮັບການສະໜັບສະໜູນໃນການປັບຕົວໃຫ້ເຂົ້າກັບຕະຫຼາດແຮງງານທີ່ປ່ຽນແປງ. ອາດຈະປະກອບມີການລົງທຶນໃນການສຶກສາ ແລະ ການຝຶກອົບຮົມຄືນໃໝ່, ພ້ອມທັງການສະໜອງມາດຕະການຮອງຮັບທາງສັງຄົມສໍາລັບຜູ້ທີ່ຖືກກະທົບຈາກ AI.

ສິ່ງສຳຄັນແມ່ນພວກເຮົາຕ້ອງມີການສົນທະນາຢ່າງກວ້າງຂວາງກ່ຽວກັບຈັນຍາບັນ ແລະ ຜົນກະທົບທາງສັງຄົມຂອງ AI ໃນສະຖານທີ່ຕ່າງໆ. ຕ້ອງຮັບປະກັນຄວາມໂປ່ງໃສ, ຄວາມຮັບຜິດຊອບ ແລະ ຄວາມເປັນທໍາຂອງອັນກໍລິທຶມ AI ທີ່ຖືກນໍາໃຊ້ເພື່ອຕັດສິນໃຈດ້ານການຈ້າງງານ. ນອກຈາກນັ້ນ ຜູ້ອອກກົດໝາຍ ແລະ ຜູ້ກໍານົດນະໂຍບາຍຄວນເຮັດວຽກຮ່ວມກັນເພື່ອພັດທະນານະໂຍບາຍທີ່ບໍ່ພຽງແຕ່ເລັ່ງການປະດິດສ້າງ AI ເທົ່ານັ້ນ, ແຕ່ຍັງປົກປ້ອງສິດທິ ແລະ ສະຫວັດດີການຂອງຄົນງານນໍາ.

ສຸດທ້າຍນີ້, ຂ້າພະເຈົ້າເຊື່ອວ່າພວກເຮົາຄວນຮັບຮູ້ບົດບາດຂອງ AI ໃນຖານະເປັນເຄື່ອງມືເພື່ອເສີມສ້າງ ແລະ ປັບປຸງຄວາມສາມາດຂອງມະນຸດ, ບໍ່ແມ່ນການທົດແທນມັນ. ໂດຍການເຮັດວຽກຮ່ວມກັນ, ມະນຸດ ແລະ ເຄື່ອງຈັກສາມາດບັນລຸຜົນໄດ້ຮັບທີ່ດີກວ່າທີ່ເຮົາເຮັດໄດ້ດ້ວຍຕົວເອງ. ເຖິງແມ່ນວ່າ ການປ່ຽນແປງແມ່ນຫຼີກລ້ຽງບໍ່ໄດ້, ການປັບໂຕ ແລະ ຮຽນຮູ້ແບບຕໍ່ເນື່ອງແມ່ນສິ່ງສໍາຄັນໃນການຮັບປະກັນວ່າ ຜົນປະໂຫຍດຂອງ AI ຖືກຈັດສັນປັນສ່ວນກັນຢ່າງເທົ່າທຽມກັນສໍາລັບຄົນເຮັດວຽກທັງໝົດ.